Mchezaji huyo mwenye umri wa miaka 22 alitolewa nje kwa utovu wa nidhamu dakika ya 97 baada ya ugomvi na Hugo Duro.
Mapema katika mchezo huo, Vinicius alijaribu kumfikishia refa taarifa kuhusu shabiki wa Valencia.
“Ubingwa ambao zamani ulikuwa mikononi mwa Ronaldinho, Ronaldo, Cristiano na Messi leo umo mikononi mwa wabaguzi,” aliandika kwenye Instagram.
“Hii si mara ya kwanza, wala ya pili, wala ya tatu. Ubaguzi ni jambo la kawaida katika La Liga. Mashindano yanafikiria ni jambo la kawaida, shirikisho pia linadhani hivyo na wapinzani wanahamasisha hilo.
“Nchi nzuri, ambayo ilinikaribisha na ninayopenda, lakini ambayo ilikubaliana kupeleka taswira ya nchi ya wabaguzi duniani. Naomba radhi kwa Waispaniola ambao hawakubaliani, lakini leo, nchini Brazil, Hispania inajulikana kama nchi ya wabaguzi.
“Na kwa bahati mbaya, kutokana na yote yanayotokea kila wiki, sina ulinzi. Nakubaliana. Lakini mimi ni mwenye nguvu na nitapigania hadi mwisho dhidi ya wabaguzi. Hata kama niko mbali na hapa.”
Katika taarifa, La Liga ilisema kuwa wamekuwa “wakipambana dhidi ya aina hii ya tabia kwa miaka mingi, na pia kuendeleza maadili chanya ya michezo, si tu uwanjani, bali nje ya uwanja pia.”
‘Stadion nzima yakirusha maneno ya ubaguzi wa rangi’ Mshambuliaji wa Brazil amekumbwa na unyanyasaji wa kibaguzi mara kadhaa msimu huu katika La Liga.
Mchezo ulisimama kwa muda katika kipindi cha pili baada ya mshambuliaji huyo wa Real Madrid kurejea kwa hasira kutokana na tukio lililotokea jukwaani.
Tangu wakati huo alikuwa na hasira na hatimaye alionyeshwa kadi nyekundu kwa mara ya kwanza katika La Liga kutokana na kuhusika kwake katika ugomvi kati ya wachezaji wa timu zote mbili.
Kocha wake Carlo Ancelotti alisema mchezo huo ungepaswa kusimamishwa kutokana na unyanyasaji uliolengwa kwa mchezaji wake.
“Kile tulichoshuhudia leo hakikubaliki. Stadion nzima ikirusha maneno ya ubaguzi wa rangi,” alisema Mwitaliano huyo.
“Sitaki kuzungumzia soka leo, hakuna maana ya kuzungumzia soka leo. Nilimwambia mwamuzi angepaswa kusimamisha mchezo.
“La Liga ina tatizo. Kwangu Vinicius ndiye mchezaji muhimu zaidi duniani. La Liga ina tatizo, visa hivi vya ubaguzi wa rangi lazima vimalizwe kwa kusimamisha mchezo.
“Ni stadion nzima inaymudhi mchezaji na nyimbo za ubaguzi wa rangi na mchezo lazima usimamishwe. Ningesema hivyo hata kama tungekuwa tukiongoza 3-0, hakuna njia nyingine.”
Ancelotti anasema ubaguzi wa rangi ni tatizo kwa soka ya Kihispania Ancelotti alisema kuwa jibu la Vinicius lilikuwa “linaweza kueleweka” katika mazingira hayo.
“Nimemuuliza ikiwa anataka kuendelea kucheza, na alibaki katika mchezo,” aliongeza kiungo huyo wa zamani wa AC Milan.
“Vinicius anahuzunika sana, ana hasira. Kitu kama hiki hakiwezi kutokea katika dunia tunayoishi.”
La Liga imesema itachunguza tukio hilo huku Valencia ikitoa taarifa kwenye tovuti yao ikilaani tukio hilo na kuthibitisha watachunguza suala hilo.
“Valencia CF inataka kulaani kwa uwazi aina yoyote ya matusi, shambulio au kumkashifu mchezaji katika soka,” ilisema taarifa hiyo.
“Klabu, katika uaminifu wake kwa maadili ya heshima na michezo, inathibitisha kwa uwazi msimamo wake dhidi ya vurugu za kimwili na kauli za matusi katika viwanja vya michezo na inasikitika kwa matukio yaliyotokea.
“Ingawa hii ni tukio moja tu, matusi kwa mchezaji yeyote kutoka timu pinzani hayana nafasi katika soka na hayalingani na maadili na utambulisho wa Valencia CF.
“Klabu inachunguza kilichotokea na itachukua hatua kali zaidi.”
La Liga ilisema itachukua “hatua za kisheria zinazofaa” ikiwa uhalifu wa chuki utabainika na kuwataka watu kuwasilisha nyenzo zinazofaa.
Taarifa hiyo ilisema wamekuwa na msimamo wa kuchukua hatua baada ya unyanyasaji wa kibaguzi dhidi ya Vinicius hapo awali, na wameandika ripoti tisa katika misimu miwili iliyopita kwa mamlaka za kisheria nchini Hispania.
Beki wa zamani wa England na Manchester United, Rio Ferdinand, alihoji ni kiasi gani Vinicius anapata msaada katika chapisho lake kwenye Instagram.
“Ndugu, unahitaji kulindwa… ni nani anayelinda Vinicius Junior nchini Hispania??” aliandika.
“Maranyingi tunahitaji kuona kijana huyu akikumbwa na hili? Naona maumivu, naona kughadhabishwa, naona anahitaji msaada… na mamlaka hazimsaidii.
“Watu wanahitaji kuungana na kudai zaidi kutoka kwa mamlaka zinazosimamia mchezo wetu.
“Hakuna mtu anayestahili hili, lakini mnaruhusu hili kutokea. Lazima kuwe na njia ya pamoja kukabiliana na hili, vinginevyo litafichwa TENA.”
Kipa wa Real Madrid, Thibaut Courtois, alisema alisikia “sauti za nyani” baada ya dakika 20 na alisema angeondoka uwanjani pamoja na Vinicius kama mchezaji mwenzake angechagua kuacha kucheza.
“Ikiwa Vini anataka kuendelea kucheza, tunacheza, lakini ikiwa Vini anasema hatapiga tena, nitatoka uwanjani pamoja naye, kwa sababu hatuwezi kuvumilia mambo kama haya,” Courtois alisema kwenye Movistar.
Rais wa Shirikisho la Soka la Brazil (CBF), Ednaldo Rodrigues, pia alionyesha kughadhabishwa kwake na tukio hilo.
“Kwa muda gani tutakabiliwa, katikati ya karne ya 21, na matukio kama lile tuliloshuhudia, tena, katika La Liga?” aliandika katika taarifa iliyotolewa na CBF kwenye Instagram.
“Kwa muda gani ubinadamu utaendelea kuwa shahidi na mshirika katika matendo ya kikatili ya ubaguzi wa rangi?”
Diego Lopez alifunga bao pekee la mchezo katika dakika ya 33 kwa upande wa wenyeji.
Soma zaidi: habari zetu kama hizi hapa