Pigo Takatifu Sehemu Ya Kwanza (01)

“Ahsante Mama Naomi” Ilikuwa ni sauti yenye upole, Matilda alikuwa akimwambia Mama Naomi huku chozi likimlenga

“Usijali Mdogo wangu Maisha ndivyo yalivyo, ni wajibu wangu kukusaidia” Alisema Mama Naomi akiwa amesimama Mlangoni, alikuwa amempatia Matilda kiasi cha shilingi Elfu tano

“Nashukuru sana, Mungu azidi kukupa Mama Naomi, unaweza ona hili ni dogo kwangu lakini Ulichonifanyia ni kikubwa mno” Alisema Matilda akiwa analia, chozi lilimlenga Mama Naomi akamwambia Matilda

“Mpeleke Mtoto Hospitalini Matilda, utanijulisha kitakachoendelea” Alisema Mama Naomi

“Ahsante sana ngoja niwahi” Akasema Matilda kisha akakimbia haraka kurudi anakoishi. Usiku huo ambao ulijawa na giza nene Matilda alikatiza Uchochoro ili awahi kufika

Bahati mbaya akakutana na vibaka wakampora pesa na kumpiga

“Jamani pesa ya Mwanangu hiyo nawaombaa, Nisaidieni Jamani” Aligumia Matilda lakini vibaka hao walikimbia, Masikini alilia sana Matilda, alikuwa Msichana wa Miaka 26 tu, akarudi anakoishi akiwa mnyonge mno, akaingia hadi nyumbani kwake, akamtazama Mtoto wake aliyeitwa Patra, alikuwa mgonjwa kwa zaidi ya miezi mitano akiwa ni Mtu wa kulala na kulishwa, Mtoto huyo alikuwa na miaka mitatu

Chozi likamvuja Matrida, alimtazama Patra akashindwa kuvumilia akakimbilia nje na kuanza kulia.

Asubuhi Mapema, Mama Naomi alikuwa wa kwanza kwenda nyumbani kwa Matilda, akamkuta akiwa amevimba macho kwa kulia

“Mbona unalia Matilda?” aliuliza, alikuwa kama ameongeza kilio kwa Matilda, alizidi kulia kwa uchungu sana

“Usilie Matilda, Mitihani ndiyo nguzo muhimu kwenye Maisha yetu sisi wanadamu, vipi ulifanikiwa kwenda Hospitali?” aliuliza Mama Naomi akiwa amebeba deli la kuuzia vitumbua

“Usiku ule nilikabwa na kuibiwa pesa Mama Naomi, hicho ndicho kinachoniumiza, laiti kama ningelijua kuwa pesa ile ingeibiwa ni bora ningekuachia ikusaidie mwenyewe” Alisema kwa Uchungu sana Matilda

“Masikini pole Mdogo wangu, Eeeh Dunia yako ina mitihani mingi lakini Usijali Mdogo wangu sawa?”

“Sawa Dada, leo sina pesa ya kula ila Mungu ndiyo anajua nitaishi vipi na huyu Mtoto, afadhali ningekuwa mwenyewe Mama Naomi yaani kila nikimtazama Patra nazidi kuumia” Alisema Matilda akiwa analia, Chozi lilikuwa likimvuja

“Usijali, Basi chukua hii hapa itakusaidia, nikirudi tutaona jinsi ya kumpeleka Hospitali Patra” Alisema Mama Naomi, japo naye alikuwa masikini lakini aliguswa mno na Maisha ya Matilda

“Sitaki kuwa mzigo kwako Dada, sipokei pesa yako sababu hata wewe kula yako ya shida, acha Mungu anipiganie Mama Naomi”

“Usiseme hivyo, Mtoto anatakiwa kula ili ameze dawa Mtilda, sifanyi kwa ajili yako bali kwa ajili ya Mtoto wako Patra” Alisema Mama Naomi, akampatia elfu mbili Matilda kisha akaondoka. Alipofika nje aligeuka na kuitazama nyumba anayoishi Matilda

Alikuwa akiishi kwenye nyumba nzuri sana ambayo laiti kama ungeambiwa kuwa anakosa hata shilingi Mia ya kununua panadol huwezi amini

“Eeeh Mungu mpunguzie Mitihani Matilda, anateseka sana” Akajisemea kisha akaondoka zake

Mara honi ya gari ikasikika, Matilda akajiuliza ni Nani aliyekuja, akaenda getini kuangalia, alishangaa kidogo kisha akafungua geti, likaingia gari la Kifahari sana, baada ya kuegesha akashuka Mwanaume mmoja akiwa na Mwanamke

“James afadhali hata nimekuona, Mtoto hali yake si nzuri siku ya tatu sasa kula ni shida, anahitaji matibabu” Alisema Matrida

“Sasa unaniambia Mimi kama Nani?” aliuliza huyo James “Wewe ni Baba wa Mtoto wangu James” Alisema Matilda

“Oooh kumbe…sikujua kama ni Baba, eti nina Mtoto mwenzio” Alisema kwa utani kisha akacheka na Mwanamke aliyekuja naye, akampiga busu

“Sikia Matilda, nilikwambia unizalie Mtoto na siyo Mfu, yule siyo Mtoto niliyekuwa namtaka, unawezaje kuwa na ujasiri wa kuniita Baba wa Mtoto ambaye ni zezeta? hivi unanionaje kwa mfano, nilivyo naweza kuwa na kitoto kama kile?” alisema James kisha akashika tumbo la huyo Mwanamke aliyekuja naye

“Mtoto wangu yupo humu Matilda, tafuta Baba haraka sana wa hiyo maiti iliyo ndani, hautokuwa na muda mrefu wa kuendelea kuishi hapa kwani Neema akijifungua atakuja kuishi hapa na Mtoto wangu. Ila usijali sababu mimba bado changa hivyo una miezi tisa ya kulea maiti yako” Alisema James, chozi lilizidi kumvuja Matilda, maneno ya kikatili yalimuumiza sana

“Baby hii ndiyo nyumba yako, utaishi hapa baada ya kujifungua sawa?” alisema James

“Asante Baby….sitaitwa Neema tena bali Mama fulani….” Alisema huyo Mwanamke wakiwa wanacheka

“ila Baby mpe hata pesa kiduchu apate kula maana anaonekana mdhaifu sana” Alisema Neema

“Kwakuwa umesema wewe Baby basi nitampatia” Alisema James kisha akatoa noti ya elfu kumi akamtupia Matilda, James alikuwa ni Mwanaume mtanashati sana, akaingia kwenye gari na Mwanamke wake wakaondoka hapo.

Matilda akainama na kuokota noti hiyo japo ilitolewa kwa masimango lakini ilikuwa ni pesa muhimu sana kuendesha Maisha yake, akafunga geti kisha akarejea ndani, akatulia kochini akiwa anakumbuka jinsi alivyokutana na James

Njombe Tanzania, Baba yake Matilda alikuwa ameketi na Mama yake Matilda nje ya nyumba yao, Baba Matilda akamuuliza Mama Matilda

“Hatuna sababu ya kuendelea kuamini kuwa Matilda yupo hai sababu ni muda mrefu tangu alipotoweka, hatuna taarifa zake na hatujui huko aliko kama yupo hai au amekufa, kwanini tusiweke Msiba?” alihoji akiwa ameketi, Mama Matilda akajaribu kumsihi

“Hatuwezi kufanya hivyo hadi pale tutakapo pata uhakika kuwa Matilda amekufa, hisia zangu zinaniambia kuwa Matilda anaishi” Alisema Mama Matilda kwa Uchungu sana

“Bado unaamini hivyo hadi leo?”

“Ndiyo Baba Matilda, tumuombee Binti yetu popote alipo Mungu anyooshe mkono wake arejee nyumbani” Alisema Mama yake Matilda, ilikuwa ni familia yenye majonzi baada ya Matilda kutoroka hapo, hakuna aliyejua kuwa Matilda alikuwa hai na alikuwa akiishi Dar tena kwa mateso makubwa sana.

“Nimesikia Maimuna anaelekea Mjini kesho, naenda kumweleza kuwa kwa upande wake ajitahidi kumtafuta Matilda huwenda alitorokea Mjini” Alisema Mama Matilda ambaye alionesha kuwa hayuko tayari kuamini kuwa Binti yake amekufa

“Sawa! siku ukikata tamaa utanieleza tuweke Msiba” Alisema Baba Yake Matilda, Basi Mama Matilda akaelekea kwa Maimuna.

Familia ilimkumbuka sana Matilda ambaye alitoroka kwao Njombe na kwenda kuishi Dar, yote aliyokuwa anayapitia hakuna aliyekuwa akiyajua kabisa, Maimuna alipewa kazi ya kumtafuta Matilda Njombe Mjini bila kujua kuwa Matilda alikuwa Dar.

Usiku ulipoingia, Matilda alisali ili Mungu ampe unafuu wa Maisha, alipomaliza aliketi kisha akamwambia Binti yake aliyekuwa kitandani akiwa hawezi kutingisha japo kidole

“Patra Mwanangu muda siyo mrefu utakuwa sawa, Mungu hawezi kutuacha kirahisi tukaangamia” Alisema Huku chozi likimbubujika. Maisha ya Matilda yalijaa maumivu makali sana, Mara geti liligongwa

Akaenda kufungua akakutana na Mama Naomi ambaye alikuwa amebeba chakula kwenye Hotpot

“Jitahidi ule na Mtoto” Alisema Mama Naomi

“Nashukuru sana Mama Naomi na Mungu akubariki” Alisema Matilda kisha alipokea chakula kutoka kwa Mama Naomi

“Msalimie shoga yangu Patra Mie hata siingii, nimemuacha Naomi anakula” Alisema

“Haya Lakini Ahsante sana”

“Usijali Matilda, nakutakia Usiku mwema” Alisema Mama Naomi, Matilda alishukuru tena kabla ya Mama Naomi kuondoka.

Aliporudi sebleni aliketi kisha akawakumbuka wazazi wake aliowaacha Njombe

“Siwezi kurudi Njombe, Baba na Mama mimi nipo hai napigania Maisha yangu” Akasema maana naye alijua ni jinsi gani wazazi wake walikuwa wakihangaika kumtafuta

Siku iliyofuata hali ya Patra ilibadilika akawa anahema kwa shida sana, Matilda akakimbilia kwa Mama Naomi akamueleza, wakarudi pamoja na kumchukua Patra hadi Hospitalini

Baada ya vipimo dokta akawaambia kuwa Mtoto anatakiwa kufanyiwa upasuaji kwa ajili ya kusafisha mapafu yake, kuanzia muda huo Patra akawekwa kwenye chumba maalum huku akisaidiwa na Mashine ya kupumulia

“Upasuaji ni gharama Dokta, Nami sina uwezo wa kugharamia!” Alisema Matilda

“Itabidi uhangaike Dada yangu sababu bila hivyo utampoteza Mtoto, fanya uwezavyo hakikisha unapata kiasi cha shilingi milioni 8 ili kunusuru Maisha ya Mtoto” Alisema

“Dokta kama alivyosema hali ya Maisha imezidi kuwa ngumu, hakuna namna Hospitali inaweza ikatusaidia ili kuokoa Maisha ya Patra?” Alidakia Mama Naomi

“Yote hayo yameangaliwa kwa mapama na marefu yake, Hospitali inaweza kukusaidia ila mzunguko wake ni mrefu mno kiasi kwamba itahatarisha hata Maisha ya Mtoto, wewe hangaika utakapofikia utasema” alieleza Dokta

Mama Naomi na Matilda wakatoka hapo, Mama Naomi akiwa na Mtoto Mgongoni akamueleza Matilda

“Itabidi uwende kwa James akakusaidie maana hicho kiasi ni kidogo kwake”

“Mama Naomi, James amemkataa Mtoto mara baada ya kuzaliwa tu, hawezi kugharamia chochote licha ya kuwa Mimi najua Mtoto ni wake” Alisema Matilda

“Damu ni nzito kuliko Maji, hebu piga moyo konde twende tukajaribu” Alisema Mama Naomi

“Haya twende Mama Naomi japo Moyo wangu unasita kwenda kwa James, unajua James wakati ananitongoza aliniambia anahitaji Mtoto, kama nitamzalia atanipa nusu ya Mali zake lakini alibadilika baada tu ya kujifungua”

“Yaliyopita si ndwele Matilda hebu twende kwa James, alivyolala jana sivyo alivyoamka leo” Mama Naomi alizidi kumpa tumaini Matilda hadi akakubali kwenda kwa James kumweleza kuhusu Mtoto

Mishale ya saa tano wakapanda Daladala kuelekea Sinza mori kutokea Hospitali ya JM iliyopo Magomeni mapipa, Kwenye daladala Matilda alikuwa kimya sana akitafakari ni jinsi gani atamueleza James, Mwanaume ambaye alionesha chuki na hasira dhidi yake pindi tu alipojifungua Mtoto mlemavu, lakini ilikuwa ni lazima akaonane na James ili asaidiwe pesa ya matibabu ya Mtoto. Alikua amekaa siti ya mbele karibu na dereva huku akipikicha macho yake kuzuia chozi kuvuja maana moyo wake ulijaa maumivu makali mno kila alipofikiria kuhusu Mtoto wake.

Haikuchukua muda mrefu wakafika Sinza ambako ofisi ya James ilikuwepo, alikuwa hapafahamu mahali ambapo James alikuwa akiishi isipokua ni kazini kwake, akasali kidogo kabla ya kugonga mlango.

Mlango ukafunguliwa na Mdada mmoja, akawaona Matilda na Mama Naomi

“Karibuni, sijui niwasiadie nini?” Aliuliza Mdada huyo mwenye rasta asilia

“Asante, Tunashida na James” alisema Matilda

“Mmeongea naye kuwa mnakuja? Maana ametoka muda siyo mrefu” “Oooh ameeleekea wapi?” Aliuliza Matilda

“Nahisi atakuwa anaelekea kwake maana mara nyingi huwa akitoka harudi hadi kesho yake”

“Sawa Asante”

“Haya karibuni tena” Alisema huyo Mdada, kisha alifunga mlango, Mama Naomi na Matilda walitazamana maana majibu waliyasikia kwa panoja, chozi lilimlenga Matilda

“Usijali Matilda tusikate tamaa kwani kwa kufanya hivyo hatutoweza kumsaidia Patra, cha msingi ni kumtafuta James, hebu mpigie nitaongea naye”

“Haya”

Matilda akatoa simu na kumpigia James lakini simu haikupokelewa kabisa, Matilda alikaa chini akaanza kulia kwa uchungu

“Matilda hapa ni ofisini kwa Watu, nyanyuka turudi Hospitalini, tutamtafuta wakati mwingine sawa!!”

“Lakini mwanangu Mama Naomi, kwanini Mimi tu kila siku, nimemkosea nini Mungu?” Alisema kwa sauti iliyojaa kilio

“Hakuna ulichomkosea Mungu Matilda, yeye anapanga na kutekeleza, hii ni mitihani yake, hakuna kilio kinachodumu….yataisha tu haya nyanyuka” Maneno ya busara ya Mama Naomi yalimsukuma Matilda akaamka, wakaanza kuondoka kurudi Magomeni mapipa.

Walipofika Hospitalini Magomeni Mapipa, Mama Naomi alimuaga Matilda sababu alikuwa na Mtoto mdogo, alihitaji kwenda nyumbani lakini alimtaka Matilda kuwa jasiri sababu akilia haitosaidia chochote kile.

“Asante Mama Naomi, Mungu azidi kukubariki” Alisema Matilda ******

“James una hakika kuwa hii ni Mimba yako?” Lilikua ni swali aliloulizwa James, walikuwa chemba na Mama yake wakimuacha Neema akiwa sebleni

“Ndiyo Mama kwanini unauliza hivyo?” Alihoji James akiwa anamtazama Mama yake, alikua ameenda kumtambulisha Neema kwa Mama yake huko Kiwalani

“Nimekuuliza tu sababu imekuwa ghafla sana James” Nini Kitaendelea? Usikose Sehemu Ya Pili Ya PIGO TAKATIFU Msisahau COMMENTS Ziwe Nyingi

Mpe Nguvu ADMIN Kwa ajili ya bando Kwa kumtumia Chochote aendelee kupost RIWAYA Hapa Kijiweni

Lipa Namba: 57900454
Jina: LIPA KIJIWENI TIPS
Mtandao: VODACOM

SOMA RIWAYA YA KOTI JEUSI KWA KUBONYEZA HAPA

SOMA RIWAYA YA FUNGATE KWA KUBONYEZA HAPA

SOMA RIWAYA YA NILIPANGA NYUMBA MOJA NA MAJINI

SOMA RIWAYA YA GORYANAH HAPA

SOMA KISASI CHANGU HAPA

SOMA RIWAYA YA MSALA HAPA