Kwako Kocha Miguel Gamondi,
Kwa heshima na taadhima, napenda kutumia fursa hii kukuandikia barua hii ambayo nina Imani kuwa utapata wasaa wa kuisoma ingawa safari yako na Yanga imehitimishwa kwa sasa, mchango wako kwa klabu na soka la Tanzania kwa ujumla hautasahaulika kamwe.
Katika kipindi chako hapa, umeonyesha weledi wa hali ya juu na kujituma kwa dhati katika kuhakikisha kwamba timu ya wananchi inafanikiwa. Mchango wako haukuwa tu kwa matokeo uwanjani bali pia katika kuimarisha wachezaji mmoja mmoja na kuwaongoza kwa ufanisi.
Miguel, Tanzania ni nchi yenye watu wakarimu, wapenzi wa michezo, na wasiochoka kutafuta mafanikio. Tunatambua kuwa katika safari ya mpira wa miguu, kuna changamoto nyingi na si kila wakati matokeo yanakwenda kama tunavyotarajia. Hata hivyo, urithi unaotuachia haupimiki kwa mafanikio ya muda mfupi pekee, bali kwa maadili na uzoefu uliochangia kwa timu yetu.
Ninakuomba, unapokuwa mbali na wapenda soka wa Tanzania basi uendelee kuwa balozi wa soka la Tanzania. Shiriki simulizi za mapokezi uliyoyapata, talanta za ajabu ulizoshuhudia, na shauku ya kipekee ya mashabiki wetu. Tanzania inazidi kupiga hatua katika soka, na tunahitaji watu kama wewe kueneza hadithi zetu kwa ulimwengu.
Milango ya Tanzania itabaki wazi kwako muda wowote utakapoamua kurejea, iwe ni kwa kazi, mapumziko, au hata kushuhudia maendeleo ya soka letu. Tunaamini bado una mengi ya kutoa kwa mpira wa miguu, na tutajivunia kuwa sehemu ya historia yako siku zote.
Tunakutakia kila la heri katika safari yako ijayo. Huko uendako, hakikisha unachukua na kulinda kumbukumbu nzuri za Tanzania na familia kubwa ya Yanga na soka la Tanzania kwa ujumla. Tunakutakia mafanikio tele na matumaini kuwa, wakati fulani, tutakutana tena katika ulimwengu huu wa kandanda.
Kwa heshima nyingi na shukrani,
SOMA PIA : Hii Vita Ya GAMONDI Na FADLU Inaichangamsha Vipi Ligi Kuu?
JIUNGE KIJIWENI WHATSAPP CHANNEL HAPA